रिपोर्टर्स क्लब नेपालले बिहीबार आयोजना गरेको साक्षात्कारमा पन्तले भन्नुभयो-’राष्ट्रपति, प्रधानमन्त्री र सभामुख पद कसैको विर्ता होइन । यसको फैसला नयाँ जनादेश अनुसारको संविधानसभाले फैसला गर्नुपर्छ । संविधानसभा सर्वशक्तिमान छ यसले नयाँ राष्ट्रपतिको चयनको लागि संविधान संशोधन गर्न परे पनि गर्नुपर्छ ।’ राष्ट्रपतिको विषयमा सडकमा बहस गर्नु भन्दा पनि कांग्रेस र एमाले बसेर सबैको सम्मान हुने गरी सबै विषयलाई प्याकेजमै सहमतिमा टुङग्याउनु पर्ने उहाँको भनाई छ ।

बहुमत आए जस्तो गरेर कांग्रेसले यो त्यो हुदैन भन्ने हो भने एमाले सरकारमा नजाने उहाँको चेतावनी छ । प्रमुख दलहरु मिलेर संविधान निर्माण र मुलुकलाई निकास दिउन भन्ने जनादेश भएकोले संविधान निर्माणमा सहज हुने गरी कम्तिमा पनि दुई तिहाई बहुमतको समर्थन भएको सरकार निर्माण हुनु पर्ने एमालेको धारणा रहेको पन्तले बताउनुभयो ।

जनताले केही सिटको तलमाथि बाहेक काग्रेस, एमाले र एमाओवादीलाई संविधान निर्माणको जिम्मेवारी दिएको भन्दै उहाँले परिणाम स्विकारेर संविधान निर्माणमा जनादेशअनुसारको भूमिका खेल्न एमाओवादीलाई आग्रह गर्नुभयो ।